Hugsanaglæpir

Ég blandaði mér lauslega í vændisumræðuna hjá Matta á dögunum og tók þar að velta fyrir mér gildi og tilgangi lagasetninga. Ég velti vöngum yfir því hvort lög séu sett í þeim eina tilgangi að hindra ákveðna hegðun hjá borgurunum (siðgæði) eða hvort takmark þeirra gæti verið að móta hugsun þeirra (siðferði).

Mér þykir tilhugsunin um hið síðara frekar nöturleg og í stíl við fasismann í bók George Orwell 1984. Og fljótt á litið mætti sjá fyrir sér að hin svokölluðu "sænsku lög", sem gera karlinn að glæpamanni en fría vændiskonuna, séu sett með það í huga að breyta viðhorfum samfélagsins til þessara hluta.

En ég er ekki viss. Það má auðveldlega færa fyrir því rök að hér sé aðeins verið að beita fælingarmætti á karlana, því flestir þeirra komi til með að hugsa sig um tvisvar áður en þeir fara að stunda slíka glæpi. En þá er bara spurningin hvort rétt sé að stela glæpnum af vændiskonunni, því ef hún er allt í einu að þessu með fullkomlega löglegum hætti verður fælingarmátturinn að tælingarmætti - konan fremur lokkuð en hitt til að ýta karlpeninginum út á glæpabrautina.

Fyrir mér er málið einfalt: Banna bæði vændiskonunni og kúnnanum að stunda þetta, eða leyfa þeim það. Og í mínum huga er ekki spurning hvor leiðin er réttari, því fælingarmáttur lagasetningarinnar hrífur einungis á hina löghlýðnustu meðal vor en fullt frelsi í þessum efnum léttir bæði á lögreglu, dómskerfi, gleðikonu og kúnna.

Nei, það er pimpið sem á að vera ólöglegt. Mansal á ekki að uppræta með því að refsa kúnnum vændiskvenna, heldur þeim sem þrælahaldið stunda.

En þetta var útúrdúr. Stóra brýningin hér er sú að bæði þrýstihópar og þeir sem setja lög og framfylgja þeim átti sig á mikilvægi þess að lög séu sett sem skorður við hegðun okkar en ekki hugsun. Frjáls hugsun er einfaldlega of frjór akur til að verjandi sé að menga hann með slíku dédété-i.

En ég hef femínistana sem heimta þessi sænsku lög yfir okkur grunaða um að vilja breyta siðferði okkar og hugsun fremur en hegðun. Gæti verið að með þessum lögum séu þeir einfaldlega að reyna að gera sér auðveldara fyrir í því að fordæma karla fyrir að kaupa vændi, þegar hægt er að halda því hátterni á lofti sem beinhörðum glæp?

Það skyldi þó ekki vera?