Mótmælahefðir

Mér þótti gríðarlega vænt um að fá að sjá myndina um Helga Hóseasson í sjónvarpinu í gær, enda var ég ekki á landinu þegar hún var sýnd í bíó.

Þessi sjónvarpssýning er raunverulega mun áhrifaríkari leið til að kynna málstað Helga fyrir þjóðinni en sýning hennar í kvikmyndahúsinu var. Ég gæti sem best trúað því að almenn viðhorfsbreyting hafi orðið til gamla mannsins á einni nóttu, svo berlega sýnir þessi mynd að þarna fer maður með heilsteypt viðhorf og mótaða siðferðiskennd, en ekki einhver rugludallur.

Vandinn við aðferðir Helga hefur fyrst og fremst falist í því að hér ríkir engin hefð fyrir aktívisma á borð við þann sem hann sýnir af sér. Við þurfum ekki annað en líta til Frakklands til að átta okkur á að Helgi myndi algerlega falla inn í fjöldann þar.