Erfðaskrá

Nú þegar Vantrú er í þann veginn að verða lögformlegur félagsskapur er kannski rétt að hafa það einhversstaðar skjalfest að bókasafn mitt skal í heild sinni hafna hjá félaginu að mér gengnum. Ég gæti orðið fyrir bíl á morgun og eins gott að þessi ágæti stafli endi ekki á fornbókasölu þar sem ekkert fæst fyrir hann.

Þarna kennir margra ágætra grasa. Þórbergur er þarna næstum í heild sinni. Hann kemur einnig fyrir í tveimur heftum Rauðra penna og kennslubókum í esperanto. Nokkrar skáldsögur Laxness eru þarna, en meira er um ritgerðir hans. Hann var súpergóður essejisti. Það er Dr. Gunni reyndar líka, sjáið kjallaragrein dagsins hjá honum. Flott!

Auðvitað er gomma af ritum um trúmál, mannskepnuna, heilastarfið og hin húmanísku fög, ásamt slatta af orðabókum og glás af gömlum pocketbókum, aðallega eftir Erskine Caldewell. Pétur Gunnarsson er þarna næstum í heild sinni, Gubbi og Eldjárn í stórum stíl og innan um er sjaldgæfara dót á borð við Ástu Sigurðar og Normu E. Samúelsdóttur.

Engum sem kemur í framtíðarhöfðustöðvar Vantrúar ætti því að leiðast.