Gegn ranglætinu

Ég held að flestum okkar sé loksins nóg boðið.

Þráinn Bertelsson skrifar helvíti flotta grein aftan á Fréttablaðið í dag, þar sem hann áfellist sjálfan sig og okkur hin fyrir tómlæti í garð illra verka valdhafanna. Og það er satt, við höfum flest verið allt of sinnulaus, kannski nöldrað aðeins út af þessu við vini og kunningja, en síðan snúið okkur að öðru.

En flestum okkar er núna að verða nóg boðið. Þegar sú staðreynd blasir við að trúfíflið Búss verður í fjögur ár í viðbót í Hvíta húsinu og í kjölfarið birtast stöðugar fréttir frá Fallujah af böðlum Bandaríkjastjórnar, þar sem þeir fremja endalausa óhæfu á írakskri alþýðu, þá er loks komið að því að við breytumst öll í Helga Hóseasson:

Ríkisstjórnin rög og hvinn
rétt af mér vill herja.
Bandarískan blóðhund sinn
býðst hún til að verja.

Helgi hefur um langa tíð ekki getað setið undir þessum viðbjóði og ákært ráðamenn og hið seka samfélag, rétt eins og Þráinn nú. Hann bendir réttilega á að ríksstjórnin geri okkur þegnana samábyrga í ógnarverkum sínum, við berum ábyrgð á blóðinu sem rennur.

Þessi skítastjórnvöld í Bandaríkjunum eru búin að bregðast rangt við allar götur frá svokölluðu 9/11. Í stað þess að skilja sneiðina og hörfa með heri sína úr múslimalöndum, koma á eðlilegu viðskiptasambandi og berjast við hlið Sameinuðu þjóðanna og mannréttindasamtökum fyrir umbótum í heiminum, þá hafa þessi gráðugu og blóðþyrstu svín hegðað sér á fullkomlega vanþroskaðan hátt, vaðið með hervaldi yfir hvað sem fyrir verður og skilið eftir sig blóð, dauða og sorg.

Helvítis viðbjóður.

Ofbeldi kallar á ofbeldi. Sterkasti leikur Bandaríkjarstjórnar nú væri að leggja nður her sinn og mælast til þess sama af öðrum þjóðum. Eini herinn sem við þurfum er friðargæslulið Sameinuðu þjóðanna. Þann her má efla og einstök ríki geta síðan biðlað til SÞ um að koma á skikki, fari eitthvað úrskeiðis heimafyrir. Bandaríkin ættu að gefa öll hergögn sín Sameinuðu þjóðunum og biðla svo til þeirra um vernd.

Einn her berst ekki við sjálfan sig. Ef heimurinn sameinast um einn her þurfa aðeins þeir sem gripið hafa til ofbeldis að komast í kast við hann.

Þessu geðbilaða vopnaskaki verður að ljúka. Þessari vitfirrtu vígbúnaðarhyggju þarf að linna. Við þurfum alla þá peninga sem nú fara í þessa klikkun til að jafna lífskjör í heiminum, leggja vatnsleiðslur og áveitur, uppræta hungur og drepsóttir, stilla til friðar og efla réttindi hinna kúguðu.

Nú er rétta stundin til að snúa þróuninni við. Nú, þegar allt ærlegt fólk hefur breyst í Helga Hós, er rétti tíminn til að láta í sér heyra. Og við skulum ekki hætta fyrr en breytingin er komin á.