Geókassaði í dag

Eftir margra daga vefráp um gáttir Garmin og Magellan, í leit að hinu eina sanna GPS-tæki fyrir fjallgöngur sumarsins stömblaði ég inn á Geocaching.com. Og gekk auðvitað beint í klúbbinn.

Geocaching er hátæknivæddur alþjóðlegur samkvæmisleikur. Þetta gengur út á að finna falda fjársjóði með því að notast við GPS-hnit, sem jafnvel verður að leysa þrautir til að komast yfir. Fjársjóðurinn inniheldur gestabók og penna, auk ýmissa smáhluta sem finnandi velur sér eitthvað til minja úr. Sjálfur setur hann eitthvað smálegt í staðinn, svo alltaf verði nóg úr að velja fyrir þá sem á eftir koma.

Ég er með gamalt Garmin GPS 38 í láni hjá Steina bróður Sunnu. Þetta tæki er a.m.k. áratugsgamalt og notast ekki við nein aukasignöl til að fá nákvæmari staðsetningu en 15 metra. Því kom mér það á óvart, þegar ég skundaði upp í Öskjuhlíð í dag til að finna Perlufjársjóðinn, að tækið leiddi mig akkúrat á punktinn svo ekki skeikaði metra. Og plastboxið fann ég þarna undir heljarinnar Grettistaki.

Ég skráði mig í gestabókina, tók úr sjóðnum forláta gelpenna og setti í staðinn þrjá fallega líparítsteina úr Móskarðshnjúkum. Útskýrði í gestabókinni að fjallið sjáist frá Öskjuhlíðinni og á heimasíðu fjársjóðsins tiltók ég GPS-hnit tindanna svo þeir sem taka steinana geti slegið þau inn í tækin sín og látið áttavitann benda á rétt fjöll.

Þetta var gríðarlega skemmtilegt og mikill fögnuður braust út innra með mér við fundinn. Ég ætla á næstu misserum að taka til við flestöll geókössin sem falin eru í innan við 50 - 100 km fjarlægð og espa jafnvel einhverja til að koma með mér.

Þetta er nebblega fínasta mótívasjón fyrir útivist.

Nú er bara að safna sér fyrir almennilegum geppsa. Sýnist sem Garmin ætli að sigra Magellan í verði og gæðum. Langar auðvitað mest í GPSMAP 60 CS, en ætli ég láti ekki eTrex Vista duga.