Mellotron

Ég verð á Nasa í kvöld að spila undir hjá MR-ingum sem etja kappi í undankeppni söngkeppni framhaldsskólanna.

Lögin eru misjöfn og flytjendurnir líka. Eitt lagið fer beinlínis í taugarnar á mér, Total Eclypse Of A Heart með Bonnie Tyler. En öfugt við Tyler er það fullkomlega þolanlegt í meðförum keppendanna, þrátt fyrir að ekki sándi þeir neitt ofuratvinnumannslega. Ég bara þoli ekki Bonnie Tyler, þá örmu væluskjóðu.

Ég er hins vegar alveg að fíla Spice Girls og Dionne Warwick. Buckley er ágætur líka, trommuleikurinn í laginu Lover You've Should Come Over er töluvert í mínum stíl, lagið dýnamískt og gaman að fást við það.

En besta lagið á prógramminu er tvímælalaust Bowie - Space Oddity. Ég er að hlusta yfir lögin núna og mellotronið hjá Bowie hefur sterk geðræn áhrif á mig, þriðji hljómurinn í fyrsta kórus mest. Dásamleg teipfelskja.

Djöfull vildi ég að ég ætti eitt svona stykki!