birgir.com

Ég ætlaði blogginu upprunalega að vera þjálfunarbúðir í ritlist og reyndi að færa eitthvað inn á hverjum degi. En þarna hafði maður ekki uppgötvað vefumsýslukerfi á borð við Movable Type og þurfti að handfæra allt inn, texta, kóða og jafnvel rss-skjal til að sjást á Rassmolunum. Þetta gat tekið á og það komu móment þarna fyrsta árið sem maður velti fyrir sér hvort maður ætti að nenna þessu yfir höfuð.

En svo tók maður Movable í þjónustu sína og allt fór að ganga betur. Það var svo ekki fyrr en nú í janúar, þegar ég ákvað að uppfæra umsýslukerfið, að allt fór í fökk og ekkert hægt að blogga. Mál stóðu þannig allt fram á síðustu daga að ég þorði ekki að koma nálægt þessu af ótta við að skemma og klúðra öllu gamla blogginu. Mér tókst að setja MT upp á ný en nú vildi það ekki kannast við gamla bloggið og það eina sem hægt var að gera var að henda gamla database-inu og byrja upp á nýtt.

Þennan tíma sem bloggið lá niðri komu endalaust móment sem mig verkjaði af bloggþörf, sér í lagi ef maður þurfti að bregðast við einhverju rugli þarna úti í samfélaginu. Í staðinn reyndi maður að nota kommentakerfi annarra, þ.e. ef þeir blogguðu um það sem hugur stóð til að tjá sig um. Ég er því óskaplega feginn að vera búinn að koma bloggvöllum mínum í gagnið aftur og veit sem er að þessi vettvangur verður mikið nýttur í framtíðinni.

Bloggið er ekki dautt, ég er rétt að byrja.